मुख्य मंत्री बणन का नुस्खा

 

मुख्य मंत्री बणन का नुस्खा 

एक  बै दो मंत्री चर्चा करण लागरे थे अक चीफ  मिनिस्टर क्यूकर बनया जा ? पहला बोल्या - इस बात का डां  ना ठा वै |भीतां कै भी कान होंसैं | जै मुख्य मंत्री नै बेरा लागग्या  तो या झंडी आली कार बी जांदी रेहगी | दूसरा बोल्या - मुख्य मंत्री नै क्यूकर बेरा लागैगा? पहला बोल्या -के बेरा इस साइंस का? जिब रिमोट कंट्रोल तैं माणस मारया जा सकै तो रिमोट कंट्रोल तैं म्हारी बात क्यूं नहीं सुनी जा सकदी ? दूसरा बोल्या - बात तो सही सै पर के सारे हरयाणा मैं रिमोट कंट्रोल फिट कर राखे होंगे ? अपां इन्द्री के रेस्ट हॉउस मैं चाल कै बात करांगे| पहला बोल्या --जै म्हारी कारों मैं ए  किमै फिट कर राख्या होगा तो के करांगे ? दूसरा बोल्या - सारा सरकारी स्टाफ छोड़ दयां सां अर कार बी छोड़ दयांगे फेर म्हारी बात क्यूकर लीक होज्यगी ? अर आपां लोटे नून गेरल्याँ सां अक इन बातां का किसे तीसरे माणस आ गै  जिकरा नहीं करांगे |

पहलया बोल्या - फेर सिक्योर्टी का मामला आ ज्यागा | दोनूं बहोतै घने लाचार हुए | पेट पा टटन   नै  होरया अर बात नहीं कर सकदे | आछे साके  होए  | करैं तो के करैं ? माहौल गरमा रया सै बेरा ना कद मांह कै कोए दा मार ज्यागा अर या चीफ मिनिस्टर शिप फेर कानों के धोरे कै लिकड़ ज्यागी | दोनों कोठी के बाहरले बगड़ मैं आगे | उसतैं पहलम अपने सारे लत्ते बी बदले | सोच्ची कदे लत्याँ मैं किमें ना धर राख्या हो | बगड़ मैं भी देख्या कोए ट्रांसमीटर तो फिट नहीं कर राख्या सै | पहला मंत्री बोल्या- एक बै मुख्य मंत्री रंगीले मूड मैं बैठ्या था| म नै बख्त बिचार कै बूझ लिया - साहब जी के कारण सै अक धरती चाहे न्यून तैं न्यून होज्या फेर मुख्य मंत्री आ पै बनो सो ? लोग नयों कह वें सें अक  इबकै थारा पत्ता कटन आला सै | म नै तो दो करोड़ की शर्त ला ली अक म्हारे मुख्य मंत्री जी का पत्ता कोनी कट सकदा | फेर के था साहब तो फ़ैल ग्या अर मेरे ताहीं सारे दां पेच  समझावन लाग्या| नयों बोल्या अक ये बाल घाम मैं ओंये थोड़े धोले कर राखे सें | एक खास नुस्खा त्यार करया सै जिसका पेटेंट बस मेरे धोरै सै  ज्याहें कर कै ह़िर फिर कै मैं ए चीफ मिनिस्टर बनूँ सूँ | हो सकै सै इस्ते   बढ़िया नुस्खे आला मेरै बी धोबी पिछाड मार सकै सै | झोंक झोंक मैं बताग्या पूरा नुस्खा | मैं तो अपने दिल पै लिखदा चाल्या गया | फेर उसकी समझ मैं आई अक हो तो गलती गयी अर मेरे पाँ पकड़ कै नयों बोल्या -- लाग दार  मेरे जीवतें जी इस नुस्खे नै अजमा कै मतना देखिये | म नै भी सैड दे सी राम की सूँ खाई अक आपके रैह्नते किस की मजाल जो मुख्य मंत्री बणन की सोच्चै| फेर भाई म नै इब यो नुस्खा अजमा कै जरूर देखना सै | पहला मंत्री एकै साँस मैं इतनी बात कह ग्या |

दूसरा मंत्री बोल्या -- तों साठ तैं ऊपर जा लिया अर मेरी तो इ बै   चालीस बरस की ए उम्र सै | मैं तो इ बै  सबर कर ल्यूँगा फेर ओ  नुस्खा तो बता कितै कोए उक चूक होगी तो नुस्खा तेरी ए गेल्याँ दफ़न हो ज्यागा | मुख्य मंत्री तो तोंये बनिए फेर एक आध साथी भी तो चाहियेगा | पहला मंत्री बोल्या -- तनै बता कै मैं अपने पाहयाँ  पै कुलहाड़ी  क्यूं मारूं ? दूसरा बोल्या -- जै तेरै इब हार्ट अटैक होज्या तो गया ना नुस्खा तेरी गेल्याँ | तेरे बालकों नै धरती भिड़ी हो ज्यागी | मैं तो तेरा आगे का राह बांधूं  था | पहला मंत्री नुस्खा बता वन लाग्या ---दस तोले सही सही तोल कै चोर बाजारी के बीज होने चाहियें | पाँच तोले खुद  गरजी की जड़ हों |छः तोले रिश्वत खोरी के पत्ते हों | तीस तोले कोरी गप शप  हों | इन सब नै मोम जस्ते मैं गेर कै खूब बारीक करकै अर इसमें पाँच तोले दगा की भस्म मिला दी जा | इस  तरियां यो कुल छप्पन तोले माल बनगया| चार तोले की एक पुडिया बाना कै त्यार करली जा|  पाँच तोले बुजदिली , चार तोले  फूल खुसामद , तीन तोले मक्कारी , दो तोले बेकूफी  के पत्ते कूट कर कै , कपड छान कर कै  पार्टी बाज़ी के पानी मैं  तीन मिहने भिगोयी  जा वें अर फेर आछी ढाल  इसकी चटनी बनाई जा | या चटनी बानगी चौदा तोले | 

पन्दरा तोले अंधेर गर्दी की ख़ाल हो पर निखालिस हिन्दुस्तानी हो , ५० तोले छान कै , लूट के  पानी मैं काढ़ा ले कै पुडिया अर चटनी मिला कै  इनकी दो दो तोले की गोली बना ली जा वें | बस दवाई त्यार सै |

इसके सेवन का तरीका बी खास सै अर अपने ढंग का सै | यो बी याद राखना बहोत जरूरी सै | इन गोलियां का इस्तेमाल छब्बीस जनवरी , पन्दरा अगस्त नै तो करया ए करया जा | दूसरा बोल्या-- गोली गरम पानी गेल्याँ खानी अक सीले पानी की गेल्याँ ? पहला बोल्या - इतना अधीर क्यों हो सै | ठगी का पाईया शरबत ले कै अर सबकी आंख बचा कै दो गोली खानी  पड़ेंगी | दूसरा बोल्या - नुस्खा तो सै बढ़िया पर अष्टा बी बहोत लागे सै | पहला बोल्या - अष्टा क्यूकर ? ये सारी चीज तो थोक मैं मिलैं सें बस रोल्ला तो इनके अनुपात का सै | दूसरा बोल्या - इनके खाए तैं बेडा पार हो ज्यागा ? पहला बोल्या - अधम बीचालै मतना टोकै | सेवन विधि पूरी हो लेनदे | बीच मैं भूलगया तो नाश हो ज्यागा | दूसरा चुप हो कै पहले की बात और बी ध्यान तैं सुनन लाग ग्या |सेवन करण खातर राज घाट पै जाना होगा अर मौसम देख कै एक की समाधी पै माथा टेकना पडेगा | उस समाधी के सो चक्कर काट कै मन -मन मैं दिल्ली की कुर्सी पै बैठे माणस की जै सात बरियाँ बोलनी पडैगी | गोली खा कै प्रेम मैं सिर झुकाना पड़ेगा| दूसरा बोल्या - इब मेरै पक्की जन्चगी तों मुख्य मंत्री जरूर बनैगा |  कति मुंह जुबानी घोट रया सै नुस्खे नैं |मेरे तो आछी तरियां  याद बी कोन्या हुया | मनै लिखवा दे | पहला बोल्या - इबै  नहीं लिखवाऊँगा मुख्य मंत्री बने पाछै |